Heb 2 | PONPDN | STEP | I ME kitail en nantion madamadaua, duen me kitail ronadar, pwe kitail ender so konoti.

Hebrews 2

1 I ME kitail en nantion madamadaua, duen me kitail ronadar, pwe kitail ender so konoti. 2 Pwe ma masan o, me pousa san ren tounlan kan, me inen o kaopa karos o katiwo karos kalokoloker duen kapun o, 3 Iaduen atail pan kak pitila, ma kitail mamaleki kamaurpa lapalap wet, me tapida ni a kalok san ren Kaun o ap pil san ren me ronoron i kan! 4 A pil Kot, me kotin kadedeki ni kilel akan, o manaman akan, o son en wiawia kelail akan, o kisakis en Nen saraui, duen pein kupur a. 5 Pwe a sota kotiki on tounlan kan, en koaki sappa kokodo, duen me se indinda. 6 A amen me kadede o inda ekis wasa: Dakot aramas o, pwe komui kin kotin kupura i, de nain aramas amen, pwe komui kotin apwali i? 7 Komui kotin kasapwilidi i ansau kis pan tounlan kan, ap kotin nine kin i linan o wau. 8 Kom kotin kaloedier karos pan aluwilu a kan. A ni a kotin kaloedi on i meakaros, solar, me sota lodi on i. A met kitail saikenta kilan, me karos lodi on i. 9 A kitail kilan Iesus, me kasapwilidi ansau kis pan tounlan kan, pweki a kalokolok on kamatala, ap nine kida linan o wau, pwen mata kila amen amen duen mak en Kot. 10 Pwe me mau on i, me dipisou kan karos wiaui oner o wiaui kidar, ni a kotin kalua won linan seri toto, en kaunsokala Tapin maur arail ki kamekam, 11 Pwe i, me kin kasaraui, o irail, me pan kasarauila, karos tapi san me ta men, i me a sota kotin namenokki riane kin irail, 12 Duen a kotin masani: I pan padaki on ri ai kan mar omui, o nan pun en momodisou I pan kaul kapin on komui. 13 O pil eu: Ipanliki i. O pil eu: Masani, iet nai o seri kan, me Kot kotiki on ia er. 14 A duen seri kan, me kisan pali nta o uduk, i me a pil kotin ale on pein i mepukat, pwe ni a matala i en kaloedi i, me kaun en mela, iei tewil o, 15 O kotin lapwada irail karos, me lodi on masak mela, ap lidulidu arain arail maur. 16 Pwe kaidin tounlan kan, me a kotin apapwali, pwe a kotin apapwali kadaudok en Apraam. 17 I me a kotin udan duela ri a kan ni meakaros, pwen kalanan o wiala samero lapalap melel amen, mon Kot, pwen tomki dip en aramas akan, 18 Pwe duen pein i kanaudokalar o soneson, a kotin mani duen sauasa irail, me sonesoner.